Atongghu malem are

ATONGGHU MALEM ARE

foto : www.kamerabawean.tk

     E sittung bekto sorop are e bulen rejeb, Hamdan manjheng2 bede e teras adekna bengkona kadhiri'en, rokok filter e tanangna kare saparo. sakejjhi'2 ngabes ka arah mata'are se kare sakobi' la tenglemma. Hamdan tojuk ka korse kaju se labennyak bekas e kakan gherejep, teros manjheng pole. Tak ambu2 se arokok, ghitak sambhik abi' rokok e tanangna la e bueng ka tanean  teros ngesep rokok anyar pole. Sompek e moana Hamdan rassana pade ken kokosna rokok filterna.

    Ojhen rete'-retek la toron . sakejjhi' lagghi' magrib pekker Hamdan, e temor petteng na ondem la ajhelan ka berak. Sakuti'-sakutik la notope sinarna mata'are se kamera-mera'an. E abes deri jheuh rete'na ojhen se toron padena aberna emas karna memantulkan sinar mata'are.

     Hamdan ghitak ambu2 se ngesep rokok, dubulen lagghi' ramadhan pekker Hamdan e delem atena. Rejeb nengkene kateppa'an mosem angen ken ojhen. La saminggu ojhen toron e tanah Bhebien, detengna pun mo la parak sorop are sambhi' samaleman tak mare2. Ojhenna ken angen-angenna sakale, tagher nyeor se tombu e budina bungkona Hamdan ondung parak robbhue.

     Hamdan apekker tagher deina se la semmo kerok tambe-tambe kerokna. rokok sa pak la parak saparoa apende ka taneanna.Ojhen raje angen santer, dile-dile'e bhein bisa benjir,  pacerengan ken ghelluren se dhullu bede nengkene la teddhi bengko kabbhi. Beremma se ngadhina'a bine ken anak lelema' se ghik kenne'-kenne' kabbhi, nambe-nambei pekkeran Hamdan se la pana bennang aghumbhel bhein.

     Mon menje bhein, sampan tak bengal ka laot pekker Hamdan pole. La parak duminggue hamdan tak majeng. hamdan nya andik sampan kennek-kennek. E delem atena hamdan apekker, mon norok paraona oreng ollena tak saberempa poleanna jhukok semmo malarat kean ekaolle. Sedhullu ghik bisa nyare kerrang e pengghir tasek mo la tak bengal ka tengnga cakna Hamdan delem ate, nengkene kekesekan la bennyak teddhi parebbhe'en.

     Sompek, rongsang ken ngastabe acampor e atena Hamdan. Apapole se mamelleakenna kolambhi are raje deri nengkene mak olle mora-mora'an, pesse se Epasiapa ka se e kapabhuka'a mo la poasa ghik tadek bhelekak. Anak se paleng toa ghitak majer SPP, aotanga ka mak toa pole malo-malo polana otang sidelena ghitak e bejer. Hamdan ambu se arokok bekto adzen magrib akasak deri corong maseghit.

     Hamdan ngalak bullu terros ngajhek anak binena asombhejeng jama'ah. E loar ghik rete'-rete' ojhenna, kasakna peltung la molae ekaeding. Samarena asombhejeng Hamdan ngajhek anak binena adhue abhereng-bhereng. moghe-moghe malem nengkene ojhen tak deteng raje mak olle bisa arangkat majeng. amin ya rabbal alamin

*Untuk kata yang dicetak miring, tidak tau bahasa baweanya yang pantas :)
 Cerpen Bawean ini sumber nya dari Baweanku (MyBawean)-Virtual Bawean island